काठमाडौं, २६ भदौ - व्यवसायीले दसैँका लागि करिब ६५ करोड मूल्यका खसी-बोका राजधानी ल्याउने तयारी थालेका छन्।

त्यसमध्ये करिब ५० हजार खसी–बोका भारतबाट आयात र बिक्री हुने व्यवसायीको भनाइ छ। चौपाया खरिद–बिक्री सेवा संघका संरक्षक दीपक थापाले दसैँमा भारतीय खसी धेरै आयात हुने जानकारी दिए। उनले भने, ‘यसपटक तुलनात्मक रूपमा धेरै भारतीय खसी आयात हुनेछन्।’ संघमा करिब तीन सय व्यवसायी आबद्ध छन्। ती व्यवसायीले भारतका विभिन्न बजारबाट खसी-बोका आयात गर्नेछन्। दसैँमा करिब १५ करोडका खसी-बोका मुलुकभित्रकै अन्य जिल्लाबाट राजधानीमा ल्याउने तयारी गरिएको छ।

भारतबाट साताको दुईपटक आइतबार र बिहीबार २० गाडी खसी-बोका आयात भइरहेको छ। एउटा गाडीमा २ सयदेखि २ सय ५० वटासम्म खसी–बोका अट्छन् । फूलपातीको आसपास पुगेपछि ५ दिनसम्म प्रत्येक दिन दैनिक २० गाडीका दरले आयात हुने संघका अध्यक्ष गोविन्द पाठकले जानकारी दिए। ‘दसैँमा मागअनुसार खसी–बोका आपूर्ति गर्न सबै व्यवसायी तयार भएर बसेका छौँ,’ उनले भने।

चार–पाँचजना मासु व्यवसायी उपत्यकामा भेडा–च्यांग्रा ल्याउन मुस्ताङतिर लागेका छन्। बाटोको असुविधाले यसपटक तिब्बतबाट च्यांग्रा आउनेछैनन्। व्यवसायीले मुस्ताङबाट करिब ५ हजार च्यांग्रा ल्याउने योजना बनाएका छन्। हिँडाएरै ल्याउने च्यांग्रा पोखरालगायत बीचबाटोमै बिक्री हुँदै काठमाडौंमा १ हजार ५ वटा ल्याउने लक्ष्य राखिएको थापाले जानकारी दिए। आजको नयाँ पत्रिका दैनिकमा खबर छ।