एजेन्सी, ११ असोज। भारतको सीमावर्ती क्षेत्र उरी आक्रमणपछि कश्मिर मुद्धालाई लिएर भारत र पाकिस्तानबीच भिडन्तको स्थिति देखिएको छ। भारत र पाकिस्तानको वाकयुद्धलाई लिएर संयुक्त राष्ट्रसंघको महासभामै आरोप प्रत्यारोपको भएको छ।

दुवै देश एकले अर्कोलाई गाली गलौज र आआफ्नै कुरालाई ठीक भन्दै घोचपेच गरिरहेका छन्। यही स्थितिमा भारतविरुद्ध पाकिस्तानको राजधानी इस्लामाबादमा वृहत प्रदर्शन भएको छ।

उक्त प्रदर्शनमा भारतीय प्रधानमन्त्री नरेन्द्र मोदीको टाउको काटेर प्रदर्शनकारी तथा पाकिस्तानी सेना प्रमुखले हातमा लिएको तस्विर सहितको पोष्टर बोकेका थिए।

पोष्टरमा पाकिस्तानी सेना प्रमुख राहिल शरीफले हातमा भारतीय प्रधानमन्त्री नरेन्द्र मोदीको काटेको टाउको लिएको देखाइएको छ। त्यसै गरी अर्को हातमा रगत लत्पतिएको तरबार देखाइएको छ।

उक्त पोष्टरको तस्विर सहितको प्रदर्शनपछि पाकिस्तानी मिडियामा यसबारे हेडलाइन समाचार बनाइएको छ। तर यता उक्त तस्बिर र प्रदर्शनलाई लिएर भारतीय सञ्‍चार माध्यममा सनसनी मच्चिएको छ।

पाकिस्तानी अखबार ‘द नेशन’का अनुसार कश्मिरमा बुरहान वानी मारिएपछि कश्मिरमा भएको हिंसाको विरोधमा भारत विरुद्ध प्रदर्शन भएको हो। गत जुलाइ ८ मा भारतीय सेनाले आतंकबादी संगठन हिजबुल मुजाहिदीनका कमाण्डर बुरहानी वानीलाई इन्काउन्टर गरेको थियो। त्यसपछि कश्मिरमा हिँसा जारी छ।

केही समय अघि मात्र पाकिस्तानका सेना प्रमुख जनरल राहिल शर्रीफले भारतप्रति चेवानीको भाषामा युद्धको धम्की नदिन सचेत गराउँदै युद्ध भए युद्ध शुरु गर्ने देशले सहनै नसक्ने क्षति व्यहोर्ने चेतावनी दिएका छन्। पाकिस्तानमाथि अल्पकालीन वा दीर्घकालीन युद्ध थोपर्न खोजेमा भारतले ठूलो मूल्य चुकाउनु पर्ने चेतावनी उनले दिएका छन्।